Motus terrae Sinas concussit 16.05.2008, klo 16.09 Gravissimus
terrae motus die Lunae regiones Sinarum medias concussit. Tantum in provincia
Sichuan minime quindecim milia hominum interierunt. Vis concussionis ex
eo apparet, quod aedificia altiora etiam Pekini et Bancokii movebantur. Etiam
Hanoii motus sentiebatur. Regimen Sinarum octoginta milia militum auxilio
victimis misit. Cum regiones maxime afflictae nondum a succursoribus adiri
potuerint, adhuc non constat, quanta sint damna et quantus numerus sit
mortuorum et vulneratorum. Succursores quidem victimarum numerum censere
conantur, quod difficillimum est, quia permulti homines sub officinis, scholis,
domibus aliisque habitationibus sepulti sunt. Viis calamitate interruptis
subsidia laborantibus ex aeroplanis et helicopteris deiciuntur. In oppido
Yingxiu prope octo milia incolarum interisse creduntur. Qui numerus non
inclusus est in illis quindecim milibus, quorum supra mentionem fecimus.
In regione Wenxchuan oppida ita deleta sunt, ut vix singulae domus
restiterint. In urbe Mianzhu, quae prope epicentrum sita est, minime decem
milia hominum sub ruinis adhuc esse dicuntur. Itemque in alia urbe, cui
nomen Mianyang, salvatores Sinenses hominum milia duodeviginti ruderibus tectos
iacere rettulerunt. In regionibus terrae motu adflictis plus centum
miliones hominum habitare constat. Novi de magnitudine calamitatis nuntii usque
afferuntur. (Tuomo Pekkanen) TERRAE MOTUS
SICHUANENSIS Saltem 60 milia periisse timentur Horribili terrae motu
magnitudine 7,9 graduum Richterianorum, qui die Lunae vastavit provinciam
Sinensem Sichuan iam 12 milia mortuorum inventi sunt ac saltem 60 milia hominum
in ipsa regione Wenchuan in ruinis quaeruntur. Pro dolor numerus victimarum a
servatoribus putatur cito valdeque creturus. Labor servatorum, quorum
maxima pars milites sunt Sinenses, impeditur ab imbribus neque viae tremore
pulsae devastataeque aditum facilem pateant. Die Martis circiter centum milites
delecti una cum esca aliisque auxiliis umbrellis descensoriis de caelo in loco
calamitatis deiecti sunt. In oppido Yingxiu, quod ad epicentrum terrae
motus propinquissimum erat, auxiliatores de ruinis effoderunt circiter 300
vulneratos sed viventes homines, nuntiat agentura diuraria Sinensium Xinhua.
Quae addit tamen verisimiliter tantum duo e decem milibus huius oppidi
incolarum vitam superare contigit. Praeter Wenchuan, quae regio
vehementissime motu terrae est afflicta, multi homines periisse creduntur in
aliis comitatibus provinciae Sichuan, ut Mianyang (18.000 hominum quaeruntur),
Mianzhu (4.800). In urbe Shifang duae officinae chimicae sunt tremore omnino
deletae, qua re calamitas nova regioni immineat: inquinatio venefica
emissionibus. Mortui sunt etiam nonnulli incolae partium provinciae
Sichuanensis satis ab epicentro remotarum, ut regio autonoma Tibetanorum Aba
necnon ipsa urbs caput provinciae, Chengdu, ubi 959 adhuc corpora inventa sunt.
Nuntiatur etiam nonnullos homines vitam amisisse in vicinis regionibus
provinciarum Gansu et Shaanxi. Propter novos tremores - iam non tantae
magnitudinis, qui tamen regulariter nonnullas regiones hodie herique pellant -
etiam multi cives, quorum domus intactae a calamitate erant, sub Iove ad tempus
manere coguntur, ut de oppido Dujiangyan nuntiat relator radiophoniae
Britannicae BBC, Michael Bristow.
ActivityRank: 121